«Як тут як там» — другі сезон
Другі сезон падкаста Менскай урбаністычнай платформы пра гарады, архітэктуру і тое, як яны змяняюцца
«Як тут як там» — гэта новы падкаст Менскай урбаністычнай платформы, дзе нашы ўнутраныя дэбаты пра сучасную ўрбаністыку выходзяць у публічную прастору. У кожным эпізодзе мы сустракаемся ўтраіх, каб з розных бакоў прафесійнай экспертызы падыскутаваць пра сусветныя ўрбаністычныя трэнды, а таксама парэфлексаваць, як гэтыя сусветныя тэндэнцыі адбіваюцца на беларускай рэчаіснасці.
У другім сезоне гаворым пра тое, каму насамрэч належыць горад, ці можа горад быць аднолькава зручным для людзей і аўтамабіляў, як палітыка і ідэалогія ўплываюць на гарадскую прастору і ці існуе ўвогуле ідэальны горад.
Мы не гарантуем простых адказаў на складаныя пытанні, але абяцаем цікавыя гутаркі і прастору для разваг.
Для каго: для жыхароў і жыхарак беларускіх гарадоў, а таксама ўсіх, хто сочыць за развіццём гарадоў у Беларусі і хоча зразумець, чаму яны выглядаюць так, а не іначай.
Фармат: 4 эпізоды падкаста па ~45 хвілін. Кожны эпізод — гэта размова паміж трыма эксперткамі і экспертамі Платформы ці запрошанымі гасцямі.
Слухайце падкаст на вашых любімых платформах
2-гі сезон
«Горад для людзей ці для машын?»
Большасць беларускіх гарадоў фармавалася ў часы, калі аўтамабіль быў сімвалам прагрэсу, а вуліца — перш за ўсё транспартнай інфраструктурай. Сёння мы ўсё часцей гаворым пра пешаходаў, веласіпедыстаў, грамадскі транспарт і права на камфортнае гарадское асяроддзе.
Ці сапраўды трэба забіраць месца ў машын, каб вярнуць яго людзям? Ці можа горад быць адначасова зручным для аўтамабіляў і прыемным для жыцця? І хто ўрэшце павінен мець прыярытэт на гарадской вуліцы?
эпізод 1
«Каму належыць горад?»
Горад — гэта прастора, якой адначасова карыстаюцца жыхары, бізнес і ўлада. Але хто насамрэч мае права вырашаць, якой яна будзе?
Разбіраемся, дзе праходзіць мяжа паміж прыватным і грамадскім, каму належаць двары, плошчы, паркі і вуліцы, і ці можа гараджанін уплываць на тое, што адбываецца ў ягоным горадзе.
эпізод 2
«Ці можна ўцячы ад савецкага горада?»
Беларускія гарады немагчыма ўявіць без савецкай спадчыны — ад планіроўкі мікрараёнаў і шырокіх праспектаў да помнікаў, двароў і тыпавой архітэктуры. Але што з ёй рабіць сёння?
Ці трэба пазбаўляцца ад савецкай гарадской спадчыны, каб будаваць новую ідэнтычнасць? Ці можна пераасэнсаваць яе без настальгіі? І наколькі архітэктура і планіроўка горада захоўваюць палітыку і ідэалогію эпохі, у якой яны былі створаныя?
эпізод 3
«Ці патрэбны нам ідэальны горад?»
Мы прывыклі ўяўляць добры горад як нешта вельмі дакладнае: прыгожыя вуліцы, новыя паркі, веладарожкі, зручны транспарт і сучасная архітэктура. Але ці існуе ўніверсальная формула добрага горада?
Чый камфорт мы маем на ўвазе, калі гаворым пра «зручны горад»? Ці можа тое, што робіць горад лепшым для адных, зрабіць яго горшым для іншых? І што важней — ідэальна спланаваны горад ці магчымасць пастаянна яго змяняць?
эпізод 4
1-шы сезон
«Панэлькі — хто каго перажыве?»
Панэльная забудова — гэта тое, што атачае кожнага і кожную з нас у беларускіх гарадах, робячы іх “шэрымі” і аднолькавымі. Але ці сапраўды панэлькі пазбаўляюць нашы гарады самабытнасці? Ці, можа, панэльная забудова — гэта інструмент, што дапамагае нам займець свае квадратныя метры ва ўмовах росту коштаў на жыллё?
У першым эпізодзе падкаста мы пагутарым пра:
панэлькі як жылы аб’ект
прасторавую арганізацыю панэльных мікрараёнаў
значэнне панэлек для сучасных гарадоў
уяўныя мадэлі будучыні, дзе панэльная забудова ёсць і дзе яе няма
эпізод 1
«Як добрыя ідэі становяцца дурацкімі праектамі?»
Усім нам знаёмая сітуацыя — амбітная, інавацыйная задумка становіцца недабудам, дзірой у бюджэце і прыкладам, якім пужаюць іншых. Як добрыя ідэі становяцца дурацкімі праектамі? Куды вымашчана дарога лепшымі намерамі планавальнікаў? І чаму birdshit happens? Абмяркоўваем на прыкладах:
шрубалётнай архітэктуры ў Эміратах,
эфекта Більбао,
іміджавай гісторыі монарэйкі.
эпізод 2
«Іржавая будучыня беларускіх гарадоў»
Прамысловая спадчына — што гэта за спадчына і ці спадчына гэта ўвогуле? Як пішацца гісторыя вакол прамысловых аб’ектаў і наколькі яна сумленная? Дзе месца чалавека і супольнасцяў у гэтых наратывах? Якія перамогі і траўмы нясе ў сябе прамысловая спадчына, і ці трэба пра гэта казаць? Разам з экспертамі абмяркуем:
разуменне таго, што такое прамысловая спадчына,
наколькі гісторыя і наратывы вакол такіх аб’ектаў сумленны, і які сэнс мы хацім перадаць праз захаванне фізічнай абалонкі,
магчымасці, якія нясе пераасэнсаванне прамысловых тэрыторый
эпізод 3
«Ці зможа спадчына без рэстаўратараў?»
Гутарка пра тое, як у Беларусі складваецца крызіс у рэстаўрацыі: чаму адукацыйныя праграмы і інстытуты закрываюцца, мадэрнізм 1970-х у Мінску «рамонтамі» губляе каштоўнасць, як энтузіясты і цэхавая культура «майстар–вучань» доўгі час трымалі сферу замест устойлівай сістэмы адукацыі і фінансавання, і чаму без адказнасці спецыялістаў і жывых супольнасцяў архітэктурная памяць гарадоў можа проста не дажыць да будучыні.