5-Я МІЖНАРОДНАЯ АНЛАЙН-КАНФЕРЭНЦЫЯ
МЕНСКАЙ УРБАНІСТЫЧНЫЙ ПЛАТФОРМЫ
Reabilitacyja
пн-пт 19:00
сб 14:00
28 лістапада —
3 снежня 2022
Аб канферэнцыі
Апошнія некалькі гадоў сталі для ўсяго свету канцэнтрацыяй пастаянных выклікаў, крызісных сітуацый і высілкаў па пераадольванні іх наступстваў. Пандэмія, кліматычныя пагрозы, войны і палітычныя крызісы не толькі нанеслі новыя траўмы ўжо ўстояным сістэмам, але і падсвяцілі іх праблемы, якія патрабуюць неадкладных вырашэнняў.
Гарады ў гэтым сэнсе ніколі не былі выключэннем. Горад як комплексны жывы арганізм заўсёды быў змушаны рэагаваць на любыя выклікі чалавецтву і прапускаў праз сябе наступствы ўсіх крызісаў. І цяпер мы знаходзімся ў крытычнай кропцы, калі кожны элемент сістэмы гарадскога планавання і праектавання патрабуе рэабілітацыі.
Калі мы кажам «рэабілітацыя горада», першая асацыяцыя — гэта рэканструкцыя будынкаў і гарадскіх прастор. Аднак горад гэта не толькі яго матэрыяльнае ўвасабленне. Гэта складаная сістэма ўзаемадзеянняў паміж рознымі актарамі і аб’ектамі. Праз паняцце Рэабілітацыі мы паспрабавалі адрэфлексаваць стан розных кампанентаў горада.
Нароўні з тым, як мы арыентуемся на стан беларускіх гарадоў і архітэктуры, для нас гэтак жа важна рэабілітаваць і падтрымліваць сувязі паміж прафесіяналамі і прафесіяналкамі, каб кожны і кожная, нягледзячы на фізічную адлегласць паміж усімі намі, ізноў пабачылі сябе часткай вялікай прафесійнай супольнасці.
Падчас жывых абмеркаванняў і вывучэння прыкладаў паспяховых пераўтварэнняў гарадоў, іх кампанентаў і цэлых сістэм, мы прааналізавалі, у якой кропцы знаходзяцца беларускія гарады зараз, а таксама куды і як можна рухацца далей. Мы разглядзелі інструменты гарадскога дызайну, практыкі і падыходы, якія можна ўжываць для рэабілітацыі беларускай сістэмы гарадскога планавання і праектавання.
фармат
Ва ўмовах лічбавай стомленасці мы змяняем фармат канферэнцыі. Гэтым разам не прыйдзецца вылучаць цэлы дзень на ўдзел у мерапрыемстве. Кожны вечар на працягу шасці дзён мы будзем сустракацца на анлайн-платформе і абмяркоўваць адзін з тэматычных кірункаў.
Хоць канферэнцыя будзе праходзіць анлайн, сёлета мы ўключаем больш інтэрактыўных фарматаў, якія дазволяць усім удзельнікам і ўдзельніцам разам абмяркоўваць і рэфлексаваць. Мы верым, што нашымі супольнымі высілкамі беларускія гарады змогуць пераадолець любыя выклікі.
расклад
«Рэабілітацыя архітэктурнай адукацыі ў Беларусі»
ПАНЯДЗЕЛАК,
28 ЛІСТАПАДА,
19:00
«Рэабілітацыя прастор малых гарадоў»
АЎТОРАК,
29 ЛІСТАПАДА,
19:00
«Рэабілітацыя прафесіі архітэктара/архітэктаркі»
СЕРАДА,
30 ЛІСТАПАДА,
19:00
«Рэабілітацыя сферы архітэктуры і будавання ва ўмовах нястачы рэсурсаў»
ЧАЦВЕРГ,
1 СНЕЖНЯ,
19:00
«Рэабілітацыя прастор з цяжкай гісторыяй»
ПЯТНІЦА,
2 СНЕЖНЯ,
19:00
«Гарады ад падрыхтоўкі да рэабілітацыі ва ўмовах узброеных канфліктаў»
СУБОТА,
3 СНЕЖНЯ,
14:00
апісанне дыскусій
ДЫСКУСІЯ
«Рэабілітацыя архітэктурнай адукацыі ў Беларусі»
У прафесійным асяроддзі ёсць недавер да беларускай архітэктурнай адукацыі, аднак у існуючай сістэме ёсць і свае плюсы. Удзельнікі і ўдзельніцы дыскусіі абмеркавалі, якія функцыі павінен выконваць сучасны ўніверсітэт і якое месца ён займае ў працэсе станаўлення архітэктара/архітэктаркі. Спікеры і спікеркі акрэслілі ролю сучаснага ўніверсітэта ў выкананні наступных задач: навучыць будучага адмыслоўца вучыцца, даць яму «азбуку» будучай прафесіі, сфармаваць прафесійную мараль і прафесійнае бачанне атачальнай рэчаіснасці, забяспечыць сетку прафесійных кантактаў і навыкі камунікацыі з прафесійным асяроддзем, навучыць вольна думаць, эксперыментаваць і адчуваць навакольны свет.
Якія якасці ўніверсітэцкай адукацыі з'яўляюцца вызначальнымі? Якія яшчэ ёсць магчымасці, каб падмацаваць якасць архітэктурнай адукацыі? На гэтыя і іншыя пытанні адказалі спікеры і спікеркі падчас дыскусіі.
ПАНЯДЗЕЛАК, 28 ЛІСТАПАДА, 19:00
ГЕОРГІЙ БАРАНЕЦ
— кандыдат архітэктуры, прафесар Дэпартамента гуманітарных навук і мастацтваў ЕГУ
ЕЛЕНА КАРПІЛАВА
— дызайнерка, куратарка, кіраўніца «Школы Архітэктурнага Мышлення для Дзяцей»
АЛЯКСАНДР НОВІКАЎ
— архітэктар, партнёр творчай майстэрні КАРАКО, кіраўнік «Школы Архітэктурнага Мышлення для Дзяцей»
АНАСТАСІЯ КАТЛЯРСКАЯ
— архітэктарка, кафаўндэрка адукацыйнага праекта YAK-TAK school
ДЫСКУСІЯ
«Рэабілітацыя прастор малых гарадоў»
Малыя гарады Беларусі на працягу гадоў сутыкаюцца з фактарамі дэпапуляцыі, нізкага ўзроўня фінансавання і шэрага іншых праблемаў. Але, нягледзячы на сацыяльна-дэмаграфічныя і сістэмныя складанасці, для беларускіх малых гарадоў характэрна ўнікальная жывучасць, і пры гэтым іх гатоўнасць да лічбавізацыі. Гэтыя рысы можна і трэба сумяшчаць для развіцця разумных малых гарадоў. У сваю чаргу, пры фармаванні стратэгіі развіцця малых гарадоў важна грунтавацца на тым, для якіх жыхароў гэта робіцца і як яны жывуць. І пры гэтым даваць свабоду самім гарадам прымаць рашэнні і фармаваць бюджэты.
Пра што яшчэ шла размова падчас дыскусіі? Даведаецеся, калі паглядзіце поўны запіс сустрэчы.
АЎТОРАК, 29 ЛІСТАПАДА, 19:00
ПАЛІНА ВАРДЭВАНЯН
— архітэктарка-даследніца, горадабудаўніца
ЗІНАІДА ЛЯШОНАК
— урбаністка, архітэктарка
ДЫСКУСІЯ
«Рэабілітацыя прафесіі архітэктара/архітэктаркі»
Што сабой уяўляе прафесія архітэктара/архітэктаркі, праектанта/праектанткі ў сучаснай Беларусі і ў свеце ўвогуле? Падчас дыскусіі удзельнікі і ўдзельніцы абмеркавалі асаблівасці прафесійнай архітэктурнай супольнасці ў Беларусі і ступень яе ўплыву на крызісы, прыняцце рашэнняў. Спікеры і спікеркі падкрэслілі, як важна выходзіць за межы свайго бюро і мець адносіны з калегамі і каляжанкамі, займацца ўтварэннем саміх сябе, каб далей расці. На дыскусіі была таксама паднята тэма аўтарства і развіцця асабістага брэнда архітэктараў і архітэктарак. Акрамя таго, удзелінікі і удзельніцы дыскусіі абмеркавалі сувязь паміж знакамітасцю і адказнасцю за праектныя вырашэнні. Падрабязнасці — ў відэазапісе сустрэчы.
СЕРАДА, 30 ЛІСТАПАДА, 19:00
АЛЯКСЕЙ ЗАНОЎСКІ
— архітэктар у фінска-дацкім офісе MASU Planning, сузаснавальнік Atelier Z+Z, сябра Фінскай асацыяцыі архітэктараў
ЛІЗАВЕТА ШЫЛІЧАВА
— архітэктар, партнёр архітэктурнай групы Radical Passive, архітэктар у David Chipperfield Architects Berlin
НАТАЛЛЯ НЯМКОВА
— архітэктарка, урбаністка, выкладчыца
АРЦЁМ ПАЛОМАНЫ
— архітэктар, прадпрымальнік
ДЫСКУСІЯ
«Рэабілітацыя сферы архітэктуры і будавання
ва ўмовах нястачы рэсурсаў»
На фоне эканамічнага крызісу сфера архітэктуры і будавання сутыкаецца з відавочнымі цяжкасцямі. Падчас дыскусіі спікеры і спікеркі абмеркавалі, як заставацца на плаву і працягваць сваю дзейнасць, будучы архітэктарам у Беларусі. Эксперты прыйшлі да высновы, што час нястачы рэсурсаў— гэта час перабудовы каштоўнасцяў, новых падыходаў і аптымізацыі. У такі перыяд патрэбна разуменне ўласнай каштоўнасці і важнасці, пошук рэсурсаў для сябе.
Удзельнікі дыскусіі выказалі думку, што працэсы, якія адбываюцца цяпер у Беларусі, не ўнікальныя, яны адбываліся і адбываюцца па ўсім свеце. Папярэднія крызісы не знішчалі сферу архітэктуры, а хутчэй падштурхоўвалі яе да змен. Удзельнікі звярнулі ўвагу на тое, што добрыя тэрыторыі ў крызісны час не забудоўваюцца, што захоўвае іх для лепшых часоў і лепшай архітэктуры. Пра што яшчэ казалі спікеры і спікеркі падчас дыскусіі? Глядзіце поўны запіс сустрэчы.
ЧАЦВЕРГ, 1 СНЕЖНЯ, 19:00
ЛЕКЦЫЯ
З ДЫСКУСІЯЙ
«Рэабілітацыя прастор з цяжкай гісторыяй»
Праца з месцамі цяжкіх успамінаў і лёсаў — гэта заўсёды дылема для праектантаў і праектантак. Падчас дыскусіі ўдзельніцы і ўдзельнікі абмеркавалі самакіраванне і нізавы ўдзел у працы з прасторамі з цяжкай гісторыяй, ролю такога ўдзелу і яго вагу. Размаўлялі пра інструменты ўплыву на лёс прастор з цяжкай гісторыяй: камунікатыўныя, адукацыйныя, фармальныя, прафесійныя.
Таксама абмеркавалі канфлікт паміж гарадскім развіццём (пад якім часта маецца на ўвазе забудова) і захаваннем ідэнтычнасці месцаў. Абмяркоўваліся пытанні выбару таго, якія гістарычныя пласты варта рэпрэзентаваць і асвятляць у працэсе мемарыялізацыі месцаў, і тыя этапы, з якіх павінна складацца праца з такімі месцамі. Каб даведацца болей, глядзіце запіс дыскусіі!
ПЯТНІЦА, 2 СНЕЖНЯ, 19:00
АЛІНА ДЗЕРАВЯНКА
— менеджэрка культурных і гістарычных праектаў
АРЦЁМ БАБОЎНІКАЎ
— графічны дызайнер, валанцёр і арганізатар праекта «Зберажом Масюкоўшчыну»
АЛЯКСАНДР ДАЛГОЎСКІ
— гісторык
МАРЫНА СЯМЕНЧАНКА
— архітэктарка, урбаністка, даследніца
ЛЕКЦЫЯ
«Гарады ад падрыхтоўкі
да рэабілітацыі ва ўмовах узброеных канфліктаў»
Сучасныя прасторы і будынкі не гатовыя да таго, каб перажыць узброеныя канфлікты і абараніць ад іх сваіх жыхароў. На лекцыі на прыкладзе гарадоў Палестыны спікерка распавяла, як гараджане і гараджанкі трансфармуюць сваё жыллё дзеля ўласнай бяспекі, такім чынам пераасэнсовываючы само паняцце дома. Дадаванне яшчэ аднаго запаснага ўвахода ў дом праз завулкі, пераўсталёўка гасцёўні і спальні далей ад вуліцы і нападаў, змяншэнне папулярнасці балконаў – невялікія прыклады адаптавання гараджанамі і гараджанкамі свайго жытла пад ваенныя ўмовы. Таксама з лекцыі вы даведаецеся, як звыклыя гарадскія прасторы здабываюць новыя функцыі, дэманструя дзіўную здольнасць змяняцца, каб выжываць.
СУБОТА, 3 СНЕЖНЯ, 14:00
САХІРА БЛЕЙБЛЕ
— даследніца, PhD ў галіне гарадскога дызайну і планавання, дацэнтка кафедры архітэктуры, гарадскога дызайну і планавання Універсітэта UAEU
спікеры
АЛІНА ДЗЕРАВЯНКА
— менеджэрка культурных і гістарычных праектаў.
Экс-дырэктар Фонду развіцця Брэсцкай крэпасці (2014-2021). Мае магістарскую ступень па гісторыі і культурным менеджменце, запрошаная лектарка ў Еўрапейскім гуманітарным універсітэце.
─────
«РЭАБІЛІТАЦЫЯ ПРАСТОР З ЦЯЖКАЙ ГІСТОРЫЯЙ»
ПЯТНІЦА, 2 СНЕЖНЯ, 19:00
АРЦЁМ БАБОЎНІКАЎ
— графічны дызайнер, валанцёр і арганізатар праекта «Зберажом Масюкоўшчыну».
Сфера прафесійных и навыковых интарэсаў — ахова гісторычнай тэрыторіі і прыцягненне ўвагі да праблем захавання архітэктурнай спадчыны праз метады візуальнага афармлення.
─────
«РЭАБІЛІТАЦЫЯ ПРАСТОР З ЦЯЖКАЙ ГІСТОРЫЯЙ»
ПЯТНІЦА, 2 СНЕЖНЯ, 19:00
АЛЯКСЕЙ ЗАНОЎСКІ
— архітэктар у фінска-дацкім офісе MASU Planning, сузаснавальнік Atelier Z+Z, сябра Фінскай асацыяцыі архітэктараў.
Скончыў магістратуру ў галіне гарадскіх даследаванняў і планавання ва Універсітэце Аалто. Мае асабісты досвед праектавання і прадпрымальніцтва ў Беларусі і Еўропе. Даследуе крытычны погляд на ролю архітэктара ў дэмакратычным грамадстве.
─────
«РЭАБІЛІТАЦЫЯ ПРАФЕСІІ АРХІТЭКТАРА/АРХІТЭКТАРКІ»
СЕРАДА, 30 ЛІСТАПАДА, 19:00
ПАЛІНА ВАРДЭВАНЯН
— архітэктарка-даследніца, горадабудаўніца.
Цягам 30 гадоў працавала ў навуковым падраздзяленні «БелНІІПгорадабудаўніцтва».
Аўтарка метадычнага дапаможніка па распрацоўцы Плана зялёнага горадабудаўніцтва для малых і сярэдніх гарадоў Беларусі.
Раней рэгулярна ўдзельнічала у праектах і ініцыятывах, злучаных з устойлівым развіццём гарадоў Беларусі: Бараўляны, Браслаў, Вілейка, Віцебск, Гарадок, Жлобін, Зэльва, Карма, Крычаў, Магілёў, Наваградак, Наваполацк, Пінск, Полацк, Слаўгарад, Чавусы.
─────
«РЭАБІЛІТАЦЫЯ ПРАСТОР МАЛЫХ ГАРАДОЎ»
АЎТОРАК, 29 ЛІСТАПАДА, 19:00
ГЕОРГІЙ БАРАНЕЦ
— кандыдат архітэктуры, прафесар Дэпартамента гуманітарных навук і мастацтваў ЕГУ.
Абараніў дысертацыю «Гарадскі ландшафт як аб'ект аховы» у СПбДАБУ, прайшоў гадавую пост-доктарскую стажыроўку ў Oxford Brookes University, School of Planning. Працаваў старшым архітэктарам у «Саюзмашпраект», вядучым навуковым супрацоўнікам у інстытуце «БелНІІПгорадабудаўніцтва». Кіраваў распрацоўкай буйнамаштабных схем і праектаў тэрытарыяльнай арганізацыі і стратэгій, займаўся распрацоўкай і ўкараненнем навучальных праграм і курсаў на розных узроўнях.
─────
«РЭАБІЛІТАЦЫЯ АРХІТЭКТУРНАЙ АДУКАЦЫІ Ў БЕЛАРУСІ»
ПАНЯДЗЕЛАК, 28 ЛІСТАПАДА, 19:00
АЛЯКСАНДР ДАЛГОЎСКІ
— гісторык.
Удзельнічаў у шэрагу праектаў па месцах масавых знішчэнняў у Трасцянцы і Менскім гета:
— Перасоўная выстава «Лагер смерці Трасцянец. Гісторыя і памяць»
— Тур «Малы Трасцянец: трагедыя і яе месца»
— Тур «Малы Трасцянец: культура памяці»
─────
«РЭАБІЛІТАЦЫЯ ПРАСТОР З ЦЯЖКАЙ ГІСТОРЫЯЙ»
ПЯТНІЦА, 2 СНЕЖНЯ, 19:00
МАРЫНА СЯМЕНЧАНКА
— архітэктарка, урбаністка, даследніца.
Магістрка Каралеўскага тэхналагічнага інстытута ў Стакгольме (Urbanism Studies), удзельніца праекта «Кветкі для Сенькіна» (памяць пра лагер ваеннапалонных «Шталаг 352»), даследніца мемарыялаў ахвярам Халакосту. Удзельніца Urban Minds (Стакгольм).
─────
«РЭАБІЛІТАЦЫЯ ПРАСТОР З ЦЯЖКАЙ ГІСТОРЫЯЙ»
ПЯТНІЦА, 2 СНЕЖНЯ, 19:00
НАТАЛЛЯ НЯМКОВА
— архітэктарка, урбаністка, выкладчыца.
Магістрка Architectural Association, Landscape Urbanism у Лондане. Сузаснавальніца IM-A Studio і Monogroup. Працавала ў міжнародным офісе Gustafson – Porter+Bowman і Giles Miller Studio. Работы Наталлі былі адзначаны на міжнародных конкурсах, уключаючы YAC і Leonardo.
Дакладчыца AA сімпозіума Design Agency within Earth Systems 2018.
Выкладчыца праграмы ASK Варшаўскай Палітэхнікі, воркшопаў Bartlett B-Pro, AALU. Цютарка European Architecture Students Assembly, Менскага архітэктурнага форума, SESAM Ex Nihilo 2018, удзельніца фестывалю Urban Oulum Баку.
─────
«РЭАБІЛІТАЦЫЯ ПРАФЕСІІ АРХІТЭКТАРА/АРХІТЭКТАРКІ»
СЕРАДА, 30 ЛІСТАПАДА, 19:00
ЛІЗАВЕТА ШЫЛІЧАВА
— архітэктар, партнёр архітэктурнай групы Radical Passive, архітэктар у David Chipperfield Architects Berlin.
Стыпендыят Ax:Son Johnson Scholarship, магістр KTH Royal Institute of Technology (Urban Studies), Стакгольм. Сфера інтарэсаў: архітэктура, грамадскія прасторы.
─────
«РЭАБІЛІТАЦЫЯ ПРАФЕСІІ АРХІТЭКТАРА/АРХІТЭКТАРКІ»
СЕРАДА, 30 ЛІСТАПАДА, 19:00
ЗІНАІДА ЛЯШОНАК
— урбаністка, архітэктарка.
Мае чатырохгадовы досвед працы ў «БелНІІПгорадабудаўніцтва» над генеральнымі планамі гарадаў і «аграгарадкоў», у тым ліку на пасадзе галоўнай архітэктаркі праекта.
Зацікаўлена ў даследаванні абмежаванняў заканадаўства, што дыктуюць падыходы да працы з гарадской прасторай. Зараз працуе «планіроўшчыцай гарадоў» ў камуне Аваннаата (Грэнландыя) агульным насельніцтвам 10 696 жыхароў.
─────
«РЭАБІЛІТАЦЫЯ ПРАСТОР МАЛЫХ ГАРАДОЎ»
АЎТОРАК, 29 ЛІСТАПАДА, 19:00
АРЦЁМ ПАЛОМАНЫ
— архітэктар, прадпрымальнік.
Асноўныя напрамкі дзейнасці: устойлівая архітэктура, дэвэлапмент і facility management камерцыйнай нерухомасці, ПропТэх.Дзесяцігоддзе творчага і прадпрыемніцкага досведу ва ўстойлівай офіснай архітэктуры, арэндзе і FM для патрабавальных кліентаў са сферы hi-tech.
─────
«РЭАБІЛІТАЦЫЯ ПРАФЕСІІ АРХІТЭКТАРА/АРХІТЭКТАРКІ»
СЕРАДА, 30 ЛІСТАПАДА, 19:00
АНАСТАСІЯ КАТЛЯРСКАЯ
— архітэктарка, кафаўндэрка адукацыйнага праекта YAK-TAK school.
Магістрка архітэктурнай школы «Архітэктурнай Асацыяцыі» (Лондан), прайшла курсы ў Дэлфтскім тэхналагічным універсітэце, YACacademy, праграму развіцця сацыяльных праектаў Social Weekend. Займалася развіццём грамадскіх прастор, ствараючы павільёны для ўзаемадзеяння людзей у Менску, Лондане, Іспаніі і Ізраілі. Раней працавала з архітэктарамі Binderman і архітэктарамі Mann-Shinar у Ізраілі ў супрацоўніцтве з архітэктурнымі студыямі KPF і Herzog & de Meuron.
─────
«РЭАБІЛІТАЦЫЯ АРХІТЭКТУРНАЙ АДУКАЦЫІ Ў БЕЛАРУСІ»
ПАНЯДЗЕЛАК, 28 ЛІСТАПАДА, 19:00
ЕЛЕНА КАРПІЛАВА
— дызайнерка, куратарка, кіраўніца «Школы Архітэктурнага Мышлення для Дзяцей».
Скончыла МДМУ ім.А.К.Глебава па спецыяльнасці «Жывапісец, педагог», БДУКМ па спецыяльнасці «Кампаратыўнае мастацтвазнаўства». Арганізатарка Minsk Design Week, куратарка праектаў і экспазіцый у Беларусі, Польшчы, Літве, Францыі.
─────
«РЭАБІЛІТАЦЫЯ АРХІТЭКТУРНАЙ АДУКАЦЫІ Ў БЕЛАРУСІ»
ПАНЯДЗЕЛАК, 28 ЛІСТАПАДА, 19:00
АЛЯКСАНДР НОВІКАЎ
— архітэктар, партнёр творчай майстэрні КАРАКО, кіраўнік «Школы Архітэктурнага Мышлення для Дзяцей».
Скончыў архітэктурны факультэт БНТУ, магістратуру архітэктурнага факультэта БНТУ, Інстытут медыя архітэктуры і дызайну «Стрэлка». Працаваў у ABD architects, архітэктурнай майстэрні Тотана Кузембаева, архітэктурным бюро АДМ. Аўтар розных праектаў у Беларусі і за мяжой.
─────
«РЭАБІЛІТАЦЫЯ АРХІТЭКТУРНАЙ АДУКАЦЫІ Ў БЕЛАРУСІ»
ПАНЯДЗЕЛАК, 28 ЛІСТАПАДА, 19:00
Сахіра Блейбле
— даследніца, PhD ў галіне гарадскога дызайну і планавання, дацэнтка кафедры архітэктуры, гарадскога дызайну і планавання Універсітэта UAEU.
Працавала навуковай супрацоўніцай Універсітэта Вашынгтона ў Сіэтле. Пастаянныя даследаванні ў асноўным звязаныя з сацыяльнай устойлівасцю людзей, якія жывуць у раёнах канфліктаў, праходнасцю, грамадскім транспартам, землекарыстаннем, прасторавымі і паводніцкімі наступствамі палітычнага і ваеннага ўздзеяння на гарадское асяроддзе. Дырэктарка выставы павільёна UAEU на выставе Dubai World Expo 2020.
─────
«ГАРАДЫ АД ПАДРЫХТОЎКІ ДА РЭАБІЛІТАЦЫІ ВА ЎМОВАХ УЗБРОЕНЫХ КАНФЛІКТАЎ»
СУБОТА, 3 СНЕЖНЯ, 14:00
Пра нас
Менская ўрбаністычная платформа — міждысцыплінарная каманда даследнікаў і даследніц, а таксама практыкаў гарадскога развіцця з працоўным досведам і адукацыяй у краінах ЕЗ і Беларусі. З 2014 года арганізуем мерапрыемствы ў сферы нефармальнай адукацыі, распрацоўваем архітэктурныя праекты і даследуем гарадское асяроддзе.
Мы зладзілі ўжо чатыры канферэнцыі, прысвечаныя разнастайным аспектам гарадскога асяроддзя. Летась прайшла канферэнцыя “Горад, які клапоціцца”, прысвечаная інструментам гарадскога дызайну, што дазваляюць людзям выяўляць клопат пра сябе і іншых, а таксама быць адкрытымі для яго. У 2020 годзе на канферэнцыі “Экалагічнасць як індыкатар якаснага жылога асяроддзя” мы вывучалі тэму экалогіі ў гарадскім асяроддзі і архітэктуры, а таксама практычныя методыкі і інструменты для стварэння ўстойлівых праектаў. У 2019 годзе наша каманда зладзіла канферэнцыю “Даступнасць як індыкатар якаснага жылога асяроддзя”, дзе абмяркоўваліся архітэктурна-планавальныя і ўрбаністычныя вырашэнні ў сферы ўніверсальнага дызайну. У 2018 годзе канферэнцыя прайшла ў рамках урбаністычнага форума і была прысвечана пілотным праектам дэвэлапменту і рэдэвэлапменту гарадскіх тэрыторый. На мерапрыемствах выступалі эксперты і эксперткі з розных краін з вялікім даследніцкім і практычным досведам.